1946 жылы 22 шілдеде Қызылорда облысы, Жаңақорған ауданы, Жетітөбе елді мекенінде теміржолшының отбасында туған. 1969 жылы ҚазМУ-дің журналистика факультетін бітірген. Еңбек жолын 1965 жылы «Жазушы» баспасында корректор болып бастаған. 1971–1982 жж. Қазақ Совет энциклопедиясында аға ғылыми қызметкер, 1982–1986 жылы «Өнер» баспасында редактор, редакция меңгерушісі болып қызмет атқарды. 1992–1995 жж. «Жалын» баспасында аға редактор, ҚР Мемлекеттік Орталық мұрағатында ғылыми басылымдар бөлімін басқарды. Осы кезде «Жалын» баспасының тапсырысы бойынша «Кәмпеске» атты тарихи-анықтамалық кітабы жарық көрді. Өмірінің соңғы жылдарында Түркістандағы Қожа Ахмет Йасауи атындағы Қазақ-Түрік университетінің аға оқытушысы болып қызмет атқарды. 

     Алғашқы өлеңдер жинағы «Бүлдіршін» деген атпен 1967 жыл «Жазушы» баспасынан жарық көрді. «Құм кескен керуен» (1971), «Саптағы сарбаз» (1974), «Тағы бір көктем» (1978), «Нұр тағысы» (1982) өлеңдер жинағының авторы. 

     «500 сұраққа жауап» атты өнертану, зерттеу кітабы (1990), «Шоқан және өнер» атты ғылыми-публицистикалық кітабы және халық суретшісі К.Тельжанов туралы тарихи-библиографиялық «Атамекен» атты повесі (1985) «Өнер» баспасынан жарық көрді. 

    1990 жылдан бастап Қорқыт жайлы еңбектері жарық көре бастады. «Жазушы» баспасынан «Күн желкен» немесе «Қорқыт ата дастаны» басылып шықты. «Қорқыт ата» энциклопедиялық жинағына (1989) «Қорқыттануға баспалдақ» атты ғылыми-зерттеу еңбегі енгізілді. 2001 жылы «Отырар кітапханасы» сериясымен «Қара шаңырақ» атты лирикалық кітабы жарық көрді.