2018 жылдың 21-22 ақпан күндері Ә.Тәжібаев атындағы облыстық әмбебап ғылыми кітапханасында  «Қаржылық сауаттылық клубы» аясында Қызылорда  облысы Кәсіпкерлер палатасымен бірге «Бизнес-Кеңесші» - кәсіпкерлік негіздерін оқыту бойынша семинар-тренинг ұйымдастырылды.

     Семинардың  басты мақсаты облыстағы кәсіпкерлер мен кәсіпкерлік бастамашылығы бар тұрғындарға бизнесті ашу және оны тиімді жүргізу бойынша кешенді бірыңғай және қол жетімді білім беру болып табылады.

     Қатысушыларға кәсіпкерліктің негізгі ұғымдары, психологиялық дайындық, маркетинг, бизнес жоспарлау, кәсіпкерліктің құқықтық негіздері тақырыптарында тренинг өткізілді.

     Тренинг соңында әр бастауыш кәсіпкерге кәсіпкерлік негіздері бойынша «Бизнес сабақтары» оқулығы, кәсіпкерлік қызмет үшін қажетті нормативтік құжаттар мен келісім шарттардың жасалу үлгілері жинақтары бар арнайы электронды тасымалдағыш таспалар берілді.

     Сонымен қатар «Кәсіпкерлік –қазақстанның жетістікке апарар күші» атты кітап көрмесінен Наполеон Хиллдің «Ойлан және байы»,Бодо Шефердің «Қаржылық тәуелсіздікке жол» Петер Друкердің  «Друкер күнделігі» атты танымал еңбектері мен қатар кез келген кәсіпті ашуға, ең алдымен, бизнес-идея керек болса «Кіші бизнес үшін 100 жоба», О.Сабден, А.Тұрғынбаеваның «Шағын бизнес негіздері», А.О.Сұлтанбекованың «Бизнестегі қазіргі заманғы ақпараттық технологиялар» т.б.кітаптарымен танысты.

   2019 жылдың  13-14 маусым күндері Ә. Тәжібаев атындағы облыстық әмбебап ғылыми кітапханасы Қызылорда облысы кәсіпкерлер палатасы  мамандарымен бірлесіп «Бизнес-Кеңесші» жобасы аясында азаматтардың жеке бизнесін ашуға және жұмысын оңтайландыруға көмек көрсететін  қысқа мерзімді кәсіпкерлерге арналған оқыту курсын  өткізді. Мақсаты – тренинг-семинарлар арқылы кәсіпкерлердің кәсіби біліктілігін көтеру болып табылады. Оқу барысында қазіргі таңда қандай кәсіппен айналысуға болады? Бизнес-жоспардың дұрыс құрастырудың жолдары қандай? Қандай салада бәсеке аз және сұраныс көп? Сондай-ақ табысты арттырудың жолдары және әлеуметтік желілерде жарнама жасаудың тәсілдері жөнінде кең көлемде мәліметтер берілді.