«Менің әлемім...» атты кездесу кеші18 желтоқсан күні есімі қалың оқырман қауымға жете таныс ақын, Қазақстанның құрметті журналисі, Қазақстан Телерадио Академиясының «Алтын жұлдыз» иегері, Халықаралық «Алаш» әдеби сыйлығының лауреаты, «Тұран» сыйлығының иегері, Қазақстан Жазушылар одағының Қызылорда облысындағы өкілі Есімсейітова Қаршыға Құрмашқызының 65 жасқа толуына орай «Менің әлемім...» атты кездесу кеші ұйымдастырылды. Шараға облыстың зиялы қауым өкілдері, шығармашыл топ жетекшілері, ардагерлер, бұқаралық ақпарат құралдарының өкілдері қатысты. Тағылымды кеште жазушыға Мәдениет және ақпарат министрі Аида Балаеваның арнайы құттықтауы табысталды. Сонымен қатар қоғам қайраткері Сайлаубай Әбішев, сырдың сыршыл ақыны, сазгер, ҚР Білім беру ісінің үздігі Ділдахан Торғаева, жазушы, журналист, Қазақстан Жазушылар Одағының мүшесі Рахмет Несібелі Төлтайқызы құттықтау сөз сөйлеп, мерейтой иесіне сый-сияпат көрсетті. Кеш барысында Бүкілодақтық халық шығармашылық фестивалінің лауреаты, ҚР Білім беру ісінің үздігі, Ы.Алтынсарин төсбелгісінің және «Құрмет» орденінің иегері Кенже Мусаеваның орындауында ақынның сөзіне жазылған «Жырыммен бірге демеңдер» әні орындалды. «Жауһар жырдың жазирасы» тақырыбындағы кітап көрмесі таныстырылды.     
|
