«Өмір шындығына адалдық» атты әдеби кеш

Ә.Тәжібаев атындағы облыстық әмбебап ғылыми кітапханасы Қазақстан Халық партиясымен бірлесе отырып, Қазақстанның Еңбек ері, қазақ әдебиетінің алып тұлғасы Әбдіжәміл Нұрпейісовтің туғанына 100 жыл толуына орай  «Өмір шындығына адалдық» атты әдеби кеш ұйымдастырды.
Кешке қоғам қайраткері С.Әбішев, Қазақстан жазушылар одағының мүшесі, белгілі жазушы Б.Ұзақбаев, ақын, Қазақстан Жазушылар Одағының Қызылорда облыстық филиланың төрайымы Қ.Есімсейітова, ҚХП ҚБ Орталық аппаратының ұйымдастыру бөлімінің басшысы Н.Оразханов, ҚХП ҚБ Орталық аппаратының   ұйымдастыру бөлімінің басшысының орынбасары А.Дукенбаева, Қорқыт Ата атындағы ҚУ қазақ тілі мен әдебиеті және журналистика білім беру бағдарламасының қауымдастырылған профессоры, ф.ғ.к. Г.Баялиева, Қорқыт Ата атындағы ҚУ аға оқытушысы Т.Телеубаев, БАҚ және зиялы қауым өкілдері, Жастар театрының өнерпаздары, жоғары оқу орындарының студенттері қатысты.
Кеш қонақтары күллі әлемге қазақ сөз өнерінің салтанатын кемел тұрғыда көрсете білген Әбдіжәміл Нұрпейісов туралы естеліктерімен бөлісті, жазушының қаламынан шыққан шоқтығы биік туындылары «Қан мен тер», «Соңғы парыз» романдарына талдау жасап, қазақтың жазба әдебиетін көркем шығармалармен толтырған классик жазушының өмірі мен шығармашылығы туралы мәліметтер берді. Жастар театрының актерлері «Әбдіжәміл әлемі» атты пролог оқыды. Сонымен қатар оқырмандар назарына «Әбдіжәміл Нұрпейісов -заманымыздың заңғар жазушысы» атты кең көлемді кітап көрмесі ұсынылды.